無論喺我自己啲 post 定朋友啲 post，不時都會見到一啲負面／否定式嘅 comment。舉下例子，如有畫師貼咗張自己畫嘅畫，就會有人留言「呢種畫風有啲過時，你應該學下 xyz」；如有人貼咗張去餐廳食好西嘅相，總有人留「呢間啲嘢麻麻，唔正宗」；有女仔貼自拍話自己買咗條靚裙，會出現「呢條裙唔襯你，着到你好肥」；有人話自己遇到某啲事好 lucky 好開心，留言會講「運氣始終會用晒」；又見過有人出 post 同自己隻病咗嘅寵物打氣、希望佢會好返，然後有個 comment「呢個 case 冇得醫，你做定心理準備好啲」等等等等。
會留呢種 comment 嘅人心態包羅萬有，有人想乘機炫耀自己嘅見識、品味或理性，有人覺得我講出心裡面嗰句只係「為你好」，有人純粹思想慣性負面諗到嗰句隨口照直講，有人反社會人格就係唔抵得人開心，又有人其實係唔多鍾意你，見你咁高興就想寸下你等你唔舒服（唔好咁得戚？）。
大家留言俾人之時，都可以留意下自己係咪講緊呢類否定式嘅說話，如果係，又如果你係上述所講最後嗰 type，咁都吹你唔脹，你喜啦；但若然你自問唔係最後嗰種人，又不時會咁 comment 嘅話，就真係要諗下點解咁做並戒一戒，人哋同你無仇無怨，發表下自己嘅感受或分享下喜悅啫，何必要潑人冷水甚至打擊人哋，令對方唔開心？咁做你得到咩好處呢？其實真係幾冇禮貌嘅一件事。唔係要誇誇群咁鳩讚，而係呢個世界仲有一個 option 叫「唔出聲」。
當然，如果單嘢係緊要嘅，eg.有人出 post「我搵到份荀工，20 萬月薪下星期去柬埔寨做 manager 呀！」呢啲人命悠關嘅嘢梗係出聲啦，但啲 post 明明無傷大雅，又唔關你事嘅，冇人問你意見就試下出少句聲，積德積福。
其實不止網絡，現實世界跟別人相處也是。但人性其實係：「我好我戥你開心，但唔可以比我好太多。」（Best comment by Jenny Chan）XDD